दार्चुला। नेपाली कांग्रेसका संस्थापन पक्षका वरिष्ठ नेताहरूले सभापति शेरबहादुर देउवासँग छलफल सुरु गरेका छन् । देउवा बसेको महाराजगंजस्थित निवासमा संस्थापन पक्षका नेताहरूको छलफल जारी छ ।

कांग्रेसमा विशेष महाधिवेशन र नियमित महाधिवेशनको बहस जारी रहँदा संस्थापन पक्षले चुनावअघि कुनै पनि महाधिवेशन नहुने अडान राखेको छ । महामन्त्रीद्वय गगन थापा र विश्वप्रकाश शर्मा विशेष महाधिवेशनको अडानमा छन् भने नेता डा। शेखर कोइराला चुनावअघि नियमित महाधिवेशनको पक्षमा छन् ।

विशेष महाधिवेशनका हस्ताक्षरकर्तालाई समेत डाकेर नियमित महाधिवेशनको दबाब दिन आग्रह गरेका शेखर, विशेष महाधिवेशन नै गर्नुपरे केन्द्रीय समितिको निर्णय र आयोजनामा हुनुपर्ने बताउँदै आएका छन् ।

कार्यवाहक सभापति पूर्णबहादुर खड्का विशेष महाधिवेशन कुनै पनि हालतमा हुन नहुने भन्दै त्यसलाई रोक्न पुस मसान्तभित्रको कार्यतालिका ल्याउनुपर्ने पक्षमा छन् । तर, संस्थापन पक्षले चुनावमा जाने वा महाधिवेशनमा जानेमध्ये एउटा मात्र विकल्प रोज्न सकिने बताउँदै आएको छ ।

विशेष महाधिवेशन जसरी पनि गर्ने हो भने त्यस्तो भन्नेहरूले नै गर्नुपर्ने भनेपछि पार्टी फुटको बहससमेत सुरु भएको छ ।

सभापति देउवा भने चुनावअघि महाधिवेशन गर्दा पार्टीभित्रै लडाइँ हुने र त्यसले चुनावमा पार्टीलाई क्षति पुग्ने भन्दै देउवाले पार्टीको भावी नेतृत्व गर्नेले नै यसबारे निर्णय गर्नुपर्ने र अगाडि नै महाधिवेशन गर्ने निर्णयमा पुगे आफू त्यसविरुद्ध नलाग्ने बताउँदै आउनुभएको छ।